Кириш сўзи

Ходимнинг кайфияти сизнинг аризангиз натижасига таъсир ўтказадими? Ҳа ва йўқ.

  • Йўқ -> Иммиграция ходимлари барчаси жудаям чуқур билимга эга бўлган профессионаллар. Шунчаки чарчагани ёки кайфияти йўқлиги сабаб сизнинг тўғри тайёрланган ҳужжатларингизни рад этмайди.
  • Ҳа -> Агар сиз ўзингиз ҳужжатларингизни пухта тайёрламай, ҳаммасини ходим қарорига ташлаб қўйсангиз, албатта таъсири бўлади.

Иш вақти тугашига 30 дақиқадан кам қолганди. Ходим бугун жудаям муаммоли ҳужжатлар билан ишлаб чарчагани шундоқ кўриниб турарди. Навбат кутиб ўтирганимда ўзим гувоҳ бўлгандим, охирги келган 3 та аризачи жуда узоқ вақт олганини ва қайта-қайта ҳужжат камчиликларини тўлдирганини. Балки мана шулар сабаб суҳбатни яхши бошлай олмадик, илтимосларим рад этилди, аммо жуда яхши кайфиятда хайрлашдик. Шу куни ходимнинг кайфиятига ижобий таъсир ўтказа олганимдан хурсанд бўлдим ва ўзим учун муҳим дарс олдим. Бу мақолада шу воқеа ҳақида батафсил айтиб бераман. Умид қиламанки, бу ҳаётий тажриба бошқаларга ҳам виза ҳужжатларини тайёрлашда фойдали бўлади.

Бу айнан бир виза тури ҳақида эмас, балки реал тажрибадан ўтган ҳужжат тайёрлаш жараёни ва натижаси ҳақида. Сиз қандай ариза билан боришингиздан қатъий назар, тахминан шунга ўхшаш тайёргарлик жараёнидан ўтасиз ва бу тажриба ҳамма ҳолатлар учун бирдек мос келади. Шунинг учун ҳам жараённи имкон қадар майда деталларигача ёритишга ҳаракат қилдим.

Воқеа

Оилам учун янги – резидентлик виза олишим керак эди. Шунчаки эски визанинг муддатини янгилаш жудаям осон, online амалга ошириш мумкин. Аммо янги виза турига ўтиш, айниқса резидент визага ариза бериш бошқа масала, бу мукаммал тайёргарлик талаб қилади ва синчков текширувдан ўтказилади. Шундай экан, бу масалада таваккал қилиб, «балки сўрамас» деган фикр билан ҳужжат топшириб бўлмайди. Ҳар доимгидек ишни 1345 га қўнғироқ қилиб, менинг ҳолатим учун керакли ҳужжатлар рўйхатини сўрашдан бошладим.

Ҳужжат тайёрлаш

1345 билан суҳбатлашганимда ходим яшириб ўтирмади, вазиятни очиқ айтди: «сен сўраётган визага ўтиш анча қийин. Ҳужжатларни тайёрлаш осон эмас». Айтганича бор экан. Шу вақтгача бунчалик кўп ҳужжат тайёрламаган эдим. Ҳатто олдиндан олинган навбатни бекор қилиб, узоқроққа кўчиришимга тўғри келди. Лекин ортга йўл йўқ, фақат олдинга. Авваламбор ишни ҳужжатларни гуруҳлаб олишдан бошладим:

  • Ўзбекистондан келтирилиши керак бўлган ҳужжатлар
  • Корея ичида шахсан бориб олиш керак бўлган ҳужжатлар
  • Online чиқариб олса бўладиган ҳужжатлар
  • Қўлда тўлдирилиши керак бўлган ҳужжатлар

Кетма-кетликда тайёргарлик бошланди.

  1. Аввало Ўзбекистондан олинадиган ҳужжатларни тайёрладим. Бу борада давлат хизматлари онлайн амалга оширилиши йўлга қўйилгани ишимни анча енгиллаштирди. Керакли ҳамма ҳужжатларни MyGov сайтидан юклаб олдим ва апостил тайёрладим. Эътибор қилинг. Шунчаки оддий таржима эмас, гап апостил ҳақида кетмоқда. Бу бўйича бир марта дарс олганман: ҳамма ҳужжатларим ўз ўрнида, фақат биргина ҳужжат таржимаси устида «apostille» печати йўқлиги сабаб, яна қайтадан тайёрлашимга тўғри келган эди. Шундай экан, маслаҳатим, доимо таржима сўралган жойда апостил тайёрлаб боринг.
  2. Кореяда ҳам деярли ҳамма ҳужжатни онлайн олиш мумкин, фақатгина тиббий сертификатлар бундан мустасно эди. Аввало бизга керакли сертификат берадиган касалхона топиш муаммо бўлди. Сабаби, талаблар орасида ёзилган барча касалликлар ва вирусларга қарши тест топширилган маълумотнома керак эди. 보건소 га қўнғироқ қилсам, «бизда бунақа тестлар олинмайди» деб жавоб қилди. 병원 ларга бирма-бир боғландим. Бири айтди, «бизда ҳаммаси бор, лекин фақат аёллардан тест оламиз», бошқаси айтди «бизда фақат биттасидан бошқа ҳамма тестлар бор». Шундай қилиб қидириб, охири Университетга тегишли бўлган катта касалхонадан топдим. Бу жараённинг ўзи 3 ҳафтага яқин вақт олди (қидирув, навбатга ёзилиш, тест топшириш ва натижасини кутиш). Shortcut. Агар сизга тиббий маълумотнома керак бўлса, ўйлаб ўтирмасдан яқинингиздаги энг катта 병원 билан боғланинг. Тиббий кўриклар нархлари ҳаммасида деярли бир хил экан, шундай экан, бирдан энг каттасига бориш орқали вақтингизни тежайсиз.
  3. Қўлда тўлдириладиган ҳужжатларга навбат келди. Булар ҳам осон бўлмади: шахсий маълумотлардан бошлаб, бутун оиламиз тарихигача сўралган саволлар бор экан. Ҳаммаси шошилмасдан тўлдирилди.
  4. Ва ниҳоят, онлайн чиқариладиган ҳужжатлар иммиграцияга бориладиган санага яқинроқ вақтда олинди.
  5. Ҳужжатларимиз тайёр бўлса ҳам, эски тажрибадан келиб чиқиб, сўраб қолиш эҳтимоли бор бўлган ҳужжатларни ҳам қўшиб қўйдим. Булар ичига компания ҳақида қўшимча маълумотлар, суғурта ва солиқ тўлангани ҳақида ҳужжатлар, ойликларим ҳар ой банк ҳисобимга тушиб боришини исботловчи охирги 1 йиллик банк транзакциялар кирар эди.

Ҳужжат топшириш

Навбат кечки соат 4 дан кейинга олинган эди. Белгиланган вақтдан ярим соат эрта бордим, сабаби ҳали навбатим келмасидан қилинадиган ишлар ҳам бор.

  • Аввало ўша ерда расмларга тушилди
  • Тўловлар олдиндан тайёрланди
  • Аризага расмлар ёпиштирилди
  • Барча ҳужжатларга имзо қўйилгани кўздан кечирилди ва саналари мос эканлиги қайтадан тасдиқланди Шу билан ҳаммаси тайёр. Энди навбатимиз чақирилишини кутиб турсак бўлгани.

Бирдан афсус қилдим. Нега? — кечки вақтга навбат олганим учун. Одатда ҳар бир аризачи учун 12 дақиқадан ажратилади, лекин ҳар доим ҳам 12 дақиқа ичида иш ҳал бўлмайди. Кимлар учундир камроқ, кимлар учундир эса кўпроқ вақт талаб қилади. Айнан ўша кун ҳамма учун кўпроқ вақт талаб қиладиган кун экан. Навбат ёзилган вақтдан 1 соатдан ҳам кўпроқ вақт кутишимизга тўғри келди ва биринчи навбатимиз 17:30 дан ўтганда етиб келди.

Lifehack. Иммиграцияда эрталабки вақтдан навбат олишга ҳаракат қилинг. Айниқса агар бир кунга кўп ишлар режа қилган бўлсангиз. Кечки вақтда навбатингиз белгилангандан эртароқ келиши ҳам ёки соатлаб кечроқ келиши ҳам мумкин. Буни сиз олдиндан била олмайсиз. Фақатгина эрталабки навбатлар ўз вақтида чақирилади. Ўз ўрнида ходимлар ҳам янги кун бошидан яхшироқ кайфиятда бўлади.

Навбат келишидан олдин кутиб ўтирганда, айнан менинг навбатим чақирилган ходим 3 та жудаям муаммоли аризачини қабул қилганини кўрган эдим. Муаммоли эканини қаердан билдим? Бу қийин бўлмади. Учаласи ҳам бир гуруҳ экан ва тушунишим бўйича ҳаммаси бир хил вазият билан келган эди. Бирининг ўрнига бошқаси қайтиб келиб ҳужжатларининг камини тўлдираверганидан муаммоли эканини ва ходим кайфиятини бузаётганини билиш қийин эмасди. Атиги учта аризачи билан 1 соатга яқин вақт ўтказишнинг ўзи ҳам қанчалик муаммоли бўлганини англатади.

Мен ҳам аслида иккита ариза билан келган эдим, ва ходимдан иккита «call number» бир эканини ва иккаласини ҳам бирдан қабул қила олишини сўрадим. Ҳозиргина шунга ўхшаш «case» дан чарчаган ходим, қўполгина қилиб, бирдан «йўқ, битта рақам учун битта аризачи» деб айтди. Шу ўринда айтиб ўтаман, навбатни 20 дақиқа оралиқ билан олганим фойда берди. Тасаввур қилинг, агар бир ариза билан ўтирган вақтимда иккинчи рақамни бошқа ходим чақириб қолса, қандай қилиб иккита жойда пайдо бўлардим?

Ҳужжатларни топширдим ва жимгина кутиб ўтирдим, ходим куни билан чарчагани билиниб турарди. Шундай бўлса ҳам узоқ вақт олмади. Бирма-бир ҳамма ҳужжатларни кўриб чиқди ва тахминан 5 дақиқа ичида қабул қилинганлик ҳақида маълумотнома бериб, кетаверишимни айтди. Биринчи ишимиз ижобий ҳал бўлганидан хурсанд бўлиб, иккинчи навбатни кутдим, узоқ вақт олмади. Омадни қаранки, иккинчи рақам ҳам айнан ўша ходимга тўғри келса бўладими?

Секингина бордим-да, «яна келдим» деб айтдим. Салгина олдин иккита аризам борлигини айтганим учун вазиятни бирдан тушунди ва у ҳам яна ўзига тўғри келганимдан ҳайрон бўлиб қабул қилди. Бу сафар кайфияти бироз яхшироқ эди. Ҳужжатларни бердим ва яна кутишни бошладим. Бу сафар ҳам узоқ вақт олмади. Бироз кутгандан сўнг, яна бир марта қабул қилинганлик ҳақида маълумотнома берди. Қизиқ қисми мана шундан кейин бошланди.

Кутилмаганда ходим, «엄청 완벽해요. 오늘 처음이에요» («жудаям яхши тайёрлабсан, бугун менга биринчи марта шундай ариза келди» маъносида) дея комплимент берди ва қўли билан 👍 «зўр» ишорасини кўрсатди. Мен раҳмат айтдим ва ходимга қараганимда, бутунлай бошқа одамни кўрдим. Биринчи келиб саломлашганимда кун бўйи ишлаб чарчаган, кайфияти йўқ ходим ўрнида, энергияга тўлган, яхши кайфиятдаги мулойим ходим турган эди. Ўша куни нафақат ўз ишимни ижобий ҳал қила олдим, балки бир инсоннинг куни яхшиланишига ҳам сабабчи бўлгандим. Мен ширин гап билан кўнглини олмадим ёки совға бериб кайфиятини кўтармадим. Шунчаки ҳужжатларимни пухта тайёрладим, ходимда ҳеч қанақа савол қолдирмадим ва ишини енгиллаштириб бердим. 3-4 дақиқа нимага ҳужжатни бу кўринишда қабул қила олмаслигини тушунтириш ўрнига, энди иссиққина чой ичиб бирон нафас ростлаши мумкин эди.

Тажриба

Бу воқеани эсласам, доим мени ходим айтган гаплари ўйлантиради: «오늘 처음이에요» – «бугун биринчиси»…

Ўша вақтда соат 6 га яқинлашиб қолган эди ва мендан кейин яна 2-3 та ариза қабул қилиб иш кунини якунлайди. Наҳотки эрталабдан кечгача биронта ҳам тўлиқ тайёрланган ариза қабул қилмаган бўлса? Албатта қабул қилган, лекин ходим кўзи билан эмас, балки аризачи тарафдан қаралганда тўлиқ аризалар келган. Бу қанақа бўлади? Биз аризачи сифатида керакли ҳамма ҳужжатларни тайёрлаймиз, ва иммиграция офисида қилиш мумкин бўлган ишларни «сўраганда қиламан» деб очиқ қолдирамиз. Булар ичида тўлов қилиш, расмга тушиш ёки расмни ёпиштириб аризага имзо қўйиш кабилар киради. Ҳужжатларингиз тўлиқ бўлса, табиийки ходим тўлов қилиб келишингизни айтиб кутиб туради ёки кейинги аризачи билан ишлаб туради. Сиз қайтиб келганингизда яна қайта ҳужжатингизни очиб тасдиқлаши керак бўлади. Бу ишлар 1-2 дақиқа вақт оладиган арзимаган бўлиши мумкин, лекин тасаввур қилинг, кунига 30 та одамга 2 дақиқадан ортиқча вақт сарфласа, 1 соат бўлади. Демак, биз учун арзимаган ишлар ходим учун ҳар кунидан соатлар йўқотишга сабаб бўлади.

Маслаҳатлар

  1. Always Overdo. Бу мен учун виза ҳужжатлари билан ишлашда доимий қоида. Мисол, туғилганлик ҳақида гувоҳнома учун оддийгина таржима қилинган ҳужжат топширилса ҳам қабул қилинаверади, лекин мен учун overdo бунда апостил тайёрлаш бўлади. Балки таржимани ҳам қабул қилар, лекин қабул қилмасачи? Шунчаки биргина шубҳаланиш ўзим учун яна 2 ҳафталик овварагарчиликка сабаб бўлиши мумкин. Ёки, суғурта ҳақида ҳужжатлар, банк транзакциялар доим ҳам сўралмайди. Лекин мабодо сўраб қолсачи? Шунчаки онлайн чиқариб олишим мумкин бўлган ҳужжат учун яна қайта иммиграция офисига боришимга тўғри келиши мумкин. Шунинг учун ҳам мен доимо керагидан ҳам, сўралганидан ҳам ортиқ тайёргарлик билан боришни устун кўраман ва барчага шуни маслаҳат бераман.

  2. Кичик деталларга эътибор беринг. Ҳужжатларнинг ҳаммасига сана қўйилганига, расм керак бўлса, у албатта ёпиштирилганига, тўловлар олдиндан тўланганига ва шунга ўхшаш арзимас деб кўринувчи деталларга албатта эътибор беринг. Сабаби, мана шу кўзга кўринмас муаммолар билан ходимлар ҳар куни ҳар бир аризачи билан қайта-қайта дуч келади. Сиз у ерга йилда бир борасиз, лекин ходимлар сизга ўхшаган аризачилар билан кунига юзлаб гаплашади. Кичик муаммолар катта муаммоларга сабаб бўлиши ҳеч гап эмас. Яна бир детални мисол қиламан. Мен доимо ҳужжатлар кетма-кетлигига ҳам эътибор қиламан. Ходим ҳаттоки ҳужжатлар ўрнини ҳам алмаштиришига эҳтиёж қолдирмаслик орқали сиз қанчалик мукаммал тайёрланганингизни кўрсатишингиз мумкин.

  3. Эртароқ боринг. Иммиграцияга борадиган вақтда олдиндан режа қилиб, навбат вақтидан камида ярим соат эрта боринг. Авваламбор тўлов қилиш ёки расмга тушиш учун навбат кўп бўлиши мумкин. Сиз эрта бориш орқали шошилмасдан барчасига улгурасиз. Ундан ташқари, қўшимча вақт сизга ҳужжатларингизни олдиндан ўзингиз текшириб олишингизга имкон беради. Балки қаердадир имзо қўйилмаган жойи бордир, балки тўлдирилмай қолиб кетган савол бордир. Мана шу кичик деталларни тўлдириб ҳужжатларингизни идеал ҳолатга келтириш учун ҳам мана шу вақт сиз учун муҳим.